CDM Municipality
Related Articles
“Ke leboga babina diphoofolo ka moka, ge baile bare ge ba ekwa pitso gotswa kantorong ya Meyaraphethishi ba re phalalela. Rena bjalo ka baetapele ba Masepala, re tlisha ditebogo go lena gobane re bana ba lena re godishitswe matsogong a lena,” a realo Meyaraphethishi Mamedupi Teffo, a leboga Magoshi nakong ya kopano ya foramo ya bona ya mafelelo ya ngwaga wa 2021.
“Le raloka karolo ye bohlokwa kudu go boetapele bja rena. Le tswelapele go re thekga ka matsatsi ka moka. Masepala wa Selete wa Capricorn, o hweditse pego ya dipuku ya go hlweka gotswa go Molekodi wa dipuku pharephare (Auditor General), le lena le ralokile karolo e kgolo kudu gore re fihlelele seo. Re kgopela le tswelepele go re thekga ka meshegofela,” a realo Meyaraphethishi a gatelela bohlokwa bja go shoma mmogo.
Meyaraphethishi o ile are,”Ke tseya sebaka se go bontsha gore retla tswelapele go shoma le lena ka dinako tsohle bjalo ka ge moeno wa rena o bolela gore ‘Re shoma le Setshaba’. Le ipshine ka maikhutso a matswalo a Morena le kgaole ngwaga gabotse go fihlila ge re kopano gape.
Magoshi a ile a amogela ka lethabo dimpho gotswa go Meyaraphethishi. Modulasetulo wa Selete wa Ntlo ya Magoshi Kgoshi Maleboho o ile a leboga kudu maitapisho a Meyaraphethishi. Kopano e be e tsenetswe ke Magoshi ka moka a Selete sa Capricorn. Kopano e be e swaretswe The Park Inn Hotel, Polokwane ka di 10 Manthole 2021.
